Missale Romanum - Hebdomada XXXIV "per annum"

Tempus "per annum"

HEBDOMADA XXXIV “ PER ANNUM ”

Dominica ultima “ per annum” fit sollemnitas Domini nostri Iesu Christi universorum Regis.

Ant. ad introitum             Cf. Ps 84, 9
Loquétur Dóminus pacem in plebem suam,
et super sanctos suos,
et in eos qui convertúntur ad ipsum.

Collecta
Excita, quǽsumus, Dómine, tuórum fidélium voluntátes,
ut, divíni óperis fructum propénsius exsequéntes,
pietátis tuæ remédia maióra percípiant.
Per Dóminum.

Super oblata
Súscipe, Dómine, sacra múnera,
quæ tuo nómini iussísti dicánda,
et, ut per ea tuæ pietáti reddámur accépti,
fac nos tuis semper obœdíre mandátis.
Per Christum.

Ant. ad communionem             Ps 116, 1-2
Laudáte Dóminum, omnes gentes,
quóniam confirmáta est super nos misericórdia eius.

Vel:             Mt 28, 20
Ecce ego vobíscum sum ómnibus diébus,
usque ad consummatiónem sǽculi, dicit Dóminus.

Post communionem
Quǽsumus, omnípotens Deus,
ut, quos divína tríbuis participatióne gaudére,
a te numquam separári permíttas.
Per Christum. 

No hay comentarios:

Publicar un comentario en la entrada