Missale Romanum - S. Martini Turonensis, episcopi

Proprium de Sanctis

November

Die 11 novembris

S. Martini Turonensis, episcopi

Memoria

Ant. ad introitum Cf. Mt 1

Suscitábo mihi sacerdótem fidélem, qui iuxta cor meum et ánimam meam fáciet, dicit Dóminus.

Collecta

Deus, qui in beáto Martíno epíscopo

sive per vitam sive per mortem magnificátus es,

ínnova grátiae tuae mirabília in córdibus nostris,

ut neque mors neque vita separáre nos possit a caritáte tua.

Per Dóminum.

Super oblata

Sanctífica, quaesumus, Dómine Deus,

haec múnera, quae in honórem

sancti Martíni laetánter offérimus,

ut per ea vita nostra inter advérsa

et próspera semper dirigátur. Per Christum.

Ant. ad communionem Cf. Mt 25,40

Amen dico vobis, quámdiu fecístis uni ex his frátribus meis mínimis, mihi fecístis, dicit Dóminus.

Post communionem

Da nobis, Dómine, unitátis sacraménto reféctis,

perféctam in ómnibus cum tua voluntáte concórdiam,

ut, sicut beátus Martínus totum se tibi subiécit,

ita et nos esse tui veráciter gloriémur.

Per Christum.