Missale Romanum - Hebdómada VII Paschæ: Feria secunda

Tempus Paschale

Feria secunda

Ant. ad introitum          Act 1, 8
Accipiétis virtútem superveniéntis Spíritus Sancti in vos,
et éritis mihi testes usque ad últimum terræ, allelúia.

Collecta
Advéniat nobis, quǽsumus, Dómine,
virtus Spíritus Sancti,
qua voluntátem tuam fidéli mente retinére,
et pia conversatióne deprómere valeámus.
Per Dóminum.

Super oblata
Sacrifícia nos, Dómine, immaculáta puríficent,
et méntibus nostris supérnæ grátiæ dent vigórem.
Per Christum.

Præfatio paschalis, vel de Ascensione.

Ant. ad communionem           Io 14, 18; 16, 22
Non vos relínquam órphanos, dicit Dóminus:
véniam ad vos íterum, et gaudébit cor vestrum, allelúia.

Post communionem
Pópulo tuo, quǽsumus, Dómine, adésto propítius,
et, quem mystériis cæléstibus imbuísti,
fac ad novitátem vitæ de vetustáte transíre.
Per Christum.