Missale Romanum - Dominica VII Paschæ

Tempus Paschale

DOMINICA VII PASCHÆ

Ant. ad introitum          Cf. Ps 26, 7-9
Exáudi, Dómine, vocem meam,
qua clamávi ad te.
Tibi dixit cor meum, quæsívi vultum tuum,
vultum tuum requíram;
ne avértas fáciem tuam a me, allelúia.

Dicitur Glória in excélsis.

Collecta
Supplicatiónibus nostris, Dómine, adésto propítius,
ut, sicut humáni géneris Salvatórem
tecum in tua crédimus maiestáte,
ita eum usque ad consummatiónem sǽculi
manére nobíscum,
sicut ipse promísit, sentiámus.
Qui tecum.

Dicitur Credo.

Super oblata
Súscipe, Dómine, fidélium preces
cum oblatiónibus hostiárum,
ut, per hæc piæ devotiónis offícia,
ad cæléstem glóriam transeámus.
Per Christum.

Præfatio paschalis, vel de Ascensione.

Ant. ad communionem          Io 17, 22
Rogo, Pater, ut sint unum,
sicut et nos unum sumus, allelúia.

Post communionem
Exáudi nos, Deus, salutáris noster,
ut per hæc sacrosánta mystéria
in totíus Ecclésiæ confidámus córpore faciéndum,
quod eius præcéssit in cápite.
Per Christum.

Adhiberi potest formula benedictionis sollemnis.