Missale Romanum - S. Bernardi, abbatis et Ecclesiæ doctoris

Proprium de Sanctis

Augustus

Die 20 augusti

S. Bernardi, abbatis

et Ecclesiæ doctoris

Memoria

Ant. ad introitum

Replévit beátum Bernárdum Dóminus spíritu intellegéntiae, et ipse fluénta doctrínae ministrávit pópulo Dei.

Collecta

Deus, qui beátum Bernárdum abbátem,

zelo domus tuae succénsum,

in Ecclésia tua lucére simul et ardére fecísti,

eius nobis intercessióne concéde,

ut, eódem spíritu fervéntes,

tamquam fílii lucis iúgiter ambulémus.

Per Dóminum.

Super oblata

Maiestáti tuae, Dómine,

unitátis et pacis offérimus sacraméntum,

sancti Bernárdi abbátis memóriam recoléntes,

qui, verbo et ópere praeclárus,

Ecclésiae tuae órdinis concórdiam strénue procurávit.

Per Christum.

Ant. ad communionem Jn 15,9

Sicut diléxit me Pater, et ego diléxi vos, dicit Dóminus; manéte in dilectióne mea.

Post communionem

Cibus, quem súmpsimus, Dómine,

in celebratióne beáti Bernárdi,

suum in nobis operétur efféctum,

ut, eius exémplis roboráti et mónitis erudíti,

Verbi tui incarnáti rapiámur amóre.

Qui vivit et regnat in saecula saeculórum.