Missale Romanum - S. Mariæ Magdalenæ

Proprium de Sanctis
Iulius

Die 22 iulii

S. MARIÆ MAGDALENÆ

Festum

Ant. ad introitum           Io 20, 17
Dixit Dóminus Maríæ Magdalénæ:
Vade ad fratres meos, et dic eis:
Ascéndo ad Patrem meum et Patrem vestrum,
Deum meum et Deum vestrum.

Collecta
Deus, cuius Unigénitus Maríæ Magdalénæ ante omnes
gáudium nuntiándum paschále commísit,
præsta, quǽsumus, ut, eius intercessióne et exémplo,
Christum vivéntem prædicémus,
et in glória tua regnántem videámus.
Qui tecum.

Super oblata
Súscipe, Dómine, múnera
in beátæ Maríæ Magdalénæ commemoratióne exhíbita,
cuius caritátis obséquium
Unigénitus Fílius tuus cleménter suscépit impénsum.
Qui vivit et regnat in sǽcula sæculórum.

Præfatio:

De apostolorum apostola

V/. Dóminus vobíscum.
R/. Et cum spíritu tuo.

V/. Sursum corda.
R/. Habémus ad Dóminum.

V/. Grátias agámus Dómino Deo nostro.
R/. Dignum et iustum est.

Vere dignum et iustum est,
æquum et salutáre,
nos te, Pater omnípotens,
cuius non minor est misericórdia quam potéstas,
in ómnibus prædicáre per Christum Dóminum nostrum.

Qui in hortu maniféstus appáruit Maríæ Magdalénæ,
quippe quae eum diléxerat vivéntem,
in cruce víderat moriéntem,
quæsíerat in sepúlcro iacéntem,
ac prima adoráverat a mórtuis resurgéntem,
et eam apostolátus offício coram apóstolis honorávit
ut bonum novæ vitæ núntium
ad mundi fines perveníret.

Unde et nos, Dómine, cum Angelis et Sanctis univérsis
tibi confitémur, in exsultatióne dicéntes:

Sanctus, Sanctus, Sanctus Dóminus Deus Sábaoth…

Ant. ad communionem          2 Cor 5, 14.15
Cáritas Christi urget nos,
ut et qui vivunt iam non sibi vivant,
sed ei qui pro ipsis mórtuus est et resurréxit.

Post communionem
Mysteriórum tuórum, Dómine, sancta percéptio
perseverántem illum nobis amórem infúndat,
quo beáta María Magdaléna
Christo magístro suo indesinénter adhǽsit.
Qui vivit et regnat in sǽcula sæculórum.