Missale Romanum - S. Barnabæ, apostoli

Propium de Sanctis

Iunius

Die 11 iunii

S. Barnabæ, apostoli

Memoria

Ant. ad introitum Cf. Ac 11,24

Beátus iste sanctus, qui annumerári méruit inter Apóstolos: erat enim vir bonus, et plenus Spíritu Sancto et fide (T.P. allelúia).

Collecta

Deus, qui beátum Bárnabam,

plenum fide et Spíritu Sancto, 

ad géntium conversiónem

segregáre praecepísti, 

concéde,  ut Evangélium Christi,

quod strénue praedicávit,

ore et ópere fidéliter nuntiétur.

Per Dóminum.

Super oblata

Obláta múnera, quaesumus, Dómine,

tua benedictióne sanctífica,

quae, te donánte, nos flamma tuae

dilectiónis accéndant,

per quam beátus Bárnabas

lumen Evangélii géntibus apportávit.

Per Christum.

Praefatio de Apostolis (I - II).

Ant. ad communionem Cf. Jn 15,15

Iam non dicam vos servos, quia servus nescit quid fáciat Dóminus eius. Vos autem dixi amícos, quia ómnia quaecúmque audívi a Patre meo, nota feci vobis (T.P. allelúia).

Post communionem

AEtérnae pignus vitae capiéntes, te, Dómine, 

humíliter implorámus,

ut, quod pro beáti Bárnabae apóstoli

memória in imágine gérimus sacraménti,

manifésta perceptióne sumámus.

Per Christum.