Missale Romanum - Hebdómada VI Paschæ: Feria quarta

Tempus Paschale

Feria quarta

Ad Missam matutinam

In regionibus ubi sollemnitas Ascensionis fit dominica sequenti, haec Missa etiam vespere adhibetur.

Ant. ad introitum           Cf. Ps 17, 50; 21, 23
Confitébor tibi in pópulis, Dómine,
et narrábo nomen tuum frátribus meis, allelúia.

Collecta
Annue nobis, quǽsumus, Dómine,
ut, quemádmodum mystério
resurrectiónis Fílii tui sollémnia cólimus,
ita et in advéntum eius gaudére
cum Sanctis ómnibus mereámur.
Per Dóminum.

Super oblata
Deus, qui nos, per huius sacrifícii veneránda commércia,
uníus summǽque divinitátis partícipes effecísti,
præsta, quǽsumus,
ut, sicut tuam cognóvimus veritátem,
sic eam dignis móribus assequámur.
Per Christum.

Præfatio paschalis.

Ant. ad communionem           Cf. Io 15, 16.19
Dicit Dóminus: Ego elégi vos de mundo
et pósui vos ut eátis, et fructum afferátis,
et fructus vester máneat, allelúia.

Post communionem
Pópulo tuo, quǽsumus, Dómine, adésto propítius,
et, quem mystériis cæléstibus imbuísti,
fac ad novitátem vitæ de vetustáte transíre.
Per Christum.