Missale Romanum - Dominica Pentecostes: Ad Missam in Vigilia

Tempus Paschale

DOMINICA PENTECOSTES

Sollemnitas

Ad Missam in Vigilia

Hæc Missa adhibetur vespere sabbati sive ante sive post I Vesperas dominicæ Pentecostes.

Ant. ad introitum         Rom 5, 5; cf. 8, 11

Cáritas Dei diffúsa est in córdibus nostris

per inhabitántem Spíritum eius in nobis, allelúia.

Dicitur  Glória in excélsis.

Collecta

Omnípotens sempitérne Deus,

qui paschále sacraméntum

quinquagínta diérum voluísti mystério continéri,

præsta, ut, géntium facta dispersióne,

divisiónes linguárum ad unam confessiónem tui nóminis

cælésti múnere congregéntur.

Per Dóminum.

Vel:

Præsta, quǽsumus, omnípotens Deus,

ut claritátis tuæ super nos splendor effúlgeat,

et lux tuæ lucis corda eórum,

qui per tuam grátiam sunt renáti,

Sancti Spíritus illustratióne confírmet.

Per Dóminum.

Dicitur Credo.

Super oblata

Præséntia múnera, quǽsumus, Dómine,

Spíritus tui benedictióne perfúnde,

ut per ipsa Ecclésiæ tuæ ea diléctio tribuátur,

per quam salutáris mystérii toto mundo véritas enitéscat.

Per Christum.

Præfatio de Pentecoste ut in Missa sequenti.

Quando adhibetur Canon romanus, dicitur Communicántes proprium.

Ant. ad communionem          Io 7, 37

Ultimo festivitátis die, stabat Iesus et clamábat dicens:

Si quis sitit, véniat ad me et bibat, allelúia.

Post communionem

Hæc nobis, Dómine, múnera sumpta profíciant,

ut illo iúgiter Spíritu ferveámus,

quem Apóstolis tuis ineffabíliter infudísti. 

Per Christum.

Adhiberi potest formula benedictionis sollemnis.

_____________________

[ SUPPLEMENTUM ]

1. In ecclesiis ubi celebratur Missa vigiliae in forma protracta, haec Missa celebrari potest modo sequenti.

2. a) Si I Vesperae in choro vel in communi Missam immediate praecedunt, actio incipere potest aut a versu introductorio et hymno Veni, creator Spiritus aut a cantu Introitus (Caritas Dei vel Dum sanctificatus) cum processione ingressus et salutatione sacerdotis, in casu alterutro omisso ritu paenitentiali (cf. Institutio generalis de Liturgia Horarum, nn. 94 et 96).

Deinde prosequitur psalmodia Vesperarum usque ad lectionem brevem exclusive.

Post psalmodiam, omisso actu paenitentiali et, pro opportunitate, Kyrie, sacerdos profert orationem:

Praesta, quaesumus ut ad Missam in Vigilia.

3. b) Si Missa incipitur modo consueto, post Kyrie, sacerdos profert orationem:

Praesta, quaesumus ut ad Missam in Vigilia.

Dein, sacerdos potest populum admonere his vel similibus verbis:

Vigiliam Pentecostes ingressi, fratres carissimi, ad exemplum Apostolorum et discipulorum qui, cum Maria, Matre Iesu, instabant in oratione, exspectantes Spiritum a Domino promissum, quieto corde nunc verbum Dei audiamus. Meditemur quanta fecit Deus populo suo et oremus, ut Spiritus Sanctus, quem Pater misit primitias credentibus, opus suum in mundo perficiat.

4. Deinde sequuntur lectiones, quas in Lectionario ad libitum proponuntur. Lector ad ambonem pergit et lectionem profert. Postea psalmista seu cantor psalmum dicit, populo responsum proferente. Omnibus deinde surgentibus, sacerdos dicit Oremus, et, postquam omnes per aliquod tempus in silentio oraverint, dicit orationem lectioni respondentem. Loco psalmi responsorii servari potest spatium sacri silentii, omissa hoc in casu, pausa post Oremus.

Orationes post lectiones

5. Post primam lectionem («Vocatum est Babel quia ibi confusum est labium universae terrae »: Gen 11, 1-9) et psalmum (32, 10-11. 12-13. 14-15; R/. [12b]: Beatus populus quem elegit Deus in hereditatem sibi).

Oremus.

Concede, quaesumus, omnipotens Deus,

ut Ecclesia tua semper ea plebs sancta permaneat

de unitate Patris et Filii et Spiritus Sancti adunata,

quae tuae sanctitatis et unitatis sacramentum

mundo manifestet

et ipsum ad perfectionem tuae conducat caritatis.

Per Christum Dominum nostrum.

R/. Amen.

6. Post secundam lectionem («Descendet Dominus coram omni plebe super montem Sinai » : Ex 19, 3-8. 16-20b) et canticum (Dan 3, 52. 53. 54. 55. 56; R/. [52b]: Et laudabilis et superexaltatus in saecula!), vel psalmum (18,8.9.10.11; R/. [Io 6,68c]: Domine, verba vitae aeternae habes).

Oremus.
Deus, qui in fulgure ignis in monte Sinai
legem antiquam Moysi dedisti
et foedus novum in igne Spiritus
hoc die manifestasti,
praesta, quaesumus, ut illo iugiter Spiritu ferveamus,
quem Apostolis tuis ineffabiliter infudisti,
et novus Israel, ex omni populo congregatus,
mandatum aeternum tui amoris laetanter accipiat.
Per Christum Dominum nostrum.
R/. Amen.

7. Post tertiam lectionem (« Ossa arida, intromittam in vos spiritum et vivetis »: Ez 37, 1-14) et psalmum (106, 2-3. 4-5. 6-7. 8-9; R/. [1]: Confitemini Domino, quoniam in saeculum misericordia
eius, vel: Alleluia).

Oremus.
Domine, Deus virtutum,
qui collapsa reparas et reparata conservas,
auge populos in tui nominis sanctificatione renovandos,
ut omnes, qui sacro Baptismate diluuntur,
tua semper inspiratione dirigantur.
Per Christum Dominum nostrum.
R/. Amen.

Vel:

Deus, qui nos verbo vitae regenerasti,
effunde super nos Spiritum Sanctum tuum,
ut, in unitate fidei ambulantes,
ad incorruptibilem glorificandae carnis resurrectionem
pervenire mereamur.
Per Christum Dominum nostrum.
R/. Amen.

Vel:

Semper exsultet populus tuus, Deus,
Spiritu Sancto tuo renovata animae iuventute,
ut, qui nunc laetatur in adoptionis se gloriam restitutum,
resurrectionis diem spe certae gratulationis exspectet.
Per Christum Dominum nostrum.
R/. Amen.

8. Post quartam lectionem (« Super servos meos et ancillas effundam Spiritum meum»: Ioel 3, 1-5) et psalmum (103, 1-2a. 24 et 35c. 27-28. 29bc-30; R/. [30] Emitte Spiritum tuum, Domine, et renova faciem terrae, vel Alleluia).

Oremus.
Promissionem tuam, quaesumus, Domine,
super nos propitiatus adimple,
ut Spiritus Sanctus adveniens
nos coram mundo testes efficiat
Evangelii Domini nostri Iesu Christi.
Qui tecum vivit et regnat in saecula saeculorum.
R/. Amen.

9. Deinde sacerdos intonat hymnum Gloria in excelsis Deo.

10. Expleto hymno, sacerdos dicit collectam, more solito:

Omnipotens sempiterne Deus, ut ad Missam in Vigilia.

11. Deinde lector profert lectionem de Apostolo (Rom 8, 22-27) et Missa prosequitur modo consueto.

12. Si Vesperae cum Missa uniuntur, post communionem cum antiphona Ultimo festivitatis die, canitur Magnificat cum sua antiphona de Vesperis Veni, Sancte Spiritus; deinde dicuntur oratio post communionem et cetera more solito.

13. Opportune adhiberi potest benedictio sollemnis. Ad populum dimittendum, diaconus vel, eo absente, ipse sacerdos cantat vel dicit:

Ite, missa est, alleluia, alleluia.

Vel:

Ite in pace, alleluia, alleluia.

R/. Deo gratias, alleluia, alleluia.