Missale Romanum - Hebdomada III Quadragesimae: Feria sexta

Tempus Quadragesimae

Feria sexta

Ant. ad introitum          Ps 85, 8.10
Non est símilis tui in diis, Dómine,
quóniam magnus es tu et fáciens mirabília;
tu es Deus solus.

Collecta
Córdibus nostris, quǽsumus, Dómine,
grátiam tuam benígnus infúnde,
ut ab humánis semper retrahámur excéssibus,
et mónitis inhærére valeámus, te largiénte, cæléstibus.
Per Dóminum.

Super oblata
Réspice, quǽsumus, Dómine,
propítius ad múnera, quæ sacrámus,
ut tibi grata reddántur,
et nobis salutária semper exsístant.
Per Christum.

Præfatio de Quadragesima.

Ant. ad communionem          Cf. Mc 12, 33
Dilígere Deum ex toto corde,
et próximum tamquam seípsum,
maius est ómnibus sacrifíciis.
Post communionem
Mentes nostras et córpora, Dómine, quǽsumus,
operátio tuæ virtútis infúndat,
ut, quod participatióne súmpsimus,
plena redemptióne capiámus.
Per Christum.

Oratio super populum
ad libitum adhibenda
Implorántes, Dómine, misericórdiam tuam,
fidéles tuos propítius intuére,
ut, qui de tua pietáte confídunt,
tuæ caritátis dona ubíque diffúndere váleant.
Per Christum.