Missale Romanum - Hebdomada III Quadragesimae: Feria tertia

Tempus Quadragesimae

Feria tertia

Ant. ad introitum          Cf. Ps 16, 6.8
Ego clamávi, quóniam exaudísti me, Deus;
inclína aurem tuam, et exáudi verba mea.
Custódi me, Dómine, ut pupíllam óculi;
sub umbra alárum tuárum prótege me.

Collecta
Grátia tua ne nos, quǽsumus, Dómine, derelínquat,
quæ et sacræ nos déditos fáciat servitúti,
et tuam nobis opem semper acquírat.
Per Dóminum.

Super oblata
Concéde nobis, quǽsumus, Dómine,
ut hæc hóstia salutáris nostrórum fiat purgátio delictórum,
et tuæ propitiátio potestátis.
Per Christum.

Præfatio de Quadragesima.

Ant. ad communionem          Cf. Ps 14, 1-2 
Dómine, quis habitábit in tabernáculo tuo?
aut quis requiéscet in monte sancto tuo?
Qui ingréditur sine mácula,
et opératur iustítiam.

Post communionem
Vivíficet nos, quǽsumus, Dómine,
huius participátio sancta mystérii,
et páriter nobis expiatiónem tríbuat et munímen.
Per Christum.

Oratio super populum
ad libitum adhibenda
Pópuli tui, Deus, institútor et rector,
peccáta, quibus impugnátur, expélle,
ut semper tibi plácitus
et tuo munímine sit secúrus.
Per Christum.