Missale Romanum - Sollemnitas Sanctae Dei Genetricis Mariae

Tempus Nativitatis

Die 1 ianuarii

In octava Nativitatis Domini

SOLLEMNITAS SANCTAE DEI GENETRICIS MARIAE

Ant. ad introitum 

Salve, sancta Parens, eníxa puérpera Regem, qui caelum terrámque regit in saecula saeculórum.

Vel: Cf. Is 9,2 Is 6; Lc 1,33 

Lux fulgébit hódie super nos, quia natus est nobis Dóminus; et vocábitur admirábilis, Deus, Princeps pacis, Pater futúri saeculi: cuius regni non erit finis.

Dicitur Gloria in excélsis.

Collecta 

Deus, qui salútis aetérnae, 

beátae Maríae virginitáte fecúnda, 

humáno géneri praemia praestitísti, tríbue, quaesumus, 

ut ipsam pro nobis intercédere sentiámus,

per quam merúimus Fílium tuum auctórem vitae suscípere. 

Qui tecum.

Dicitur Credo.

Super oblata 

Deus, qui bona cuncta ínchoas benígnus et pérficis, 

da nobis, de sollemnitáte sanctae Dei Genetrícis laetántibus, 

sicut de inítiis tuae grátiae gloriámur 

ita de perfectióne gaudére. 

Per Christum.

Praefatio I de beata Maria Virgine (Et te in sollemnitáte).

Quando adhibetur Canon romanus, dicitur Communicántes proprium

Ant. ad communionem     He 13,8 

Iesus Christus heri et hódie, ipse et in saecula.

Post communionem 

Súmpsimus, Dómine, laeti sacraménta caeléstia: 

praesta, quaesumus, 

ut ad vitam nobis profíciant sempitérnam, 

qui beátam semper Vírginem Maríam 

Fílii tui Genetrícem et Ecclésiae Matrem 

profitéri gloriámur. 

Per Christum.

Adhiberi potest formula benedictionis sollemnis.